Koda Magudi Apc Bazata iya cin zabe a wasu jahohin Arewa ba- inji Sanata Bukar Abba

Tsohon gwamnan jihar Yobe, Bukar Abba Ibrahim, ya bayyana cewar zai yi wuya jam'iyyar APC ta iya yin nasara jihohin yankin arewa maso ga...

Tsohon gwamnan jihar Yobe, Bukar Abba Ibrahim, ya bayyana cewar zai yi wuya jam'iyyar APC ta iya yin nasara jihohin yankin arewa maso gabas a zaben shekarar 2019 ko da za ta yi magudin zabe. Jihohin yankin Arewa maso gabas din su ne Adamawa, Bauchi, Borno, Gombe, Taraba da Yobe. Bukar Abba, wanda shine Sanatan APC mai wakiltar gabashin jihar Yobe, ya ce al'amura sun kara lalacewa karkashin mulkin jam'iyyar APC tare da bayyana cewar matukar ba su gaggauta yin gyara ba za su sha kaye a zaben 2019. Kazalika ya bayyana cewar bai kamata a raina yankin arewa maso gabas ba, yana mai fadin cewar mutanen yankin sun san 'yancin su a siyasance. "Babu abin da ya canja, lamura ma sun kara lalacewa ne kawai. Ran jama'a a bace yake, ba na jin ko da magudi za iya lashe zabe", cewar Sanatan, wanda mai dakinsa Khadija Bukar Abba take rike da mukamin minista a yanzu.