wata mata Ta sayar da jaririyarta ’yar mako shida ta sayi waya

Wata matar aure mai shekara 23, mai suna Miracle Johnson ta shiga hannun ’yan sanda a Jihar Edo bisa zarginta da sayar da jaririyar da ta ha...

Wata matar aure mai shekara 23, mai suna Miracle Johnson ta shiga hannun ’yan sanda a Jihar Edo bisa zarginta da sayar da jaririyar da ta haifa ’yar mako shida. Mai jegon wadda ta fito daga garin Agenebode, a karamar Hukumar Etsako ta Gabas da ke jihar an ce ta sayar da jaririyar ce mai suna Greatness, ga wani gidan marayu a Anacha da ke Jihar Anambara a kan Naira dubu 200 inda aka biya ta lakadan. Kwamishinan ’Yan sandan Jihar Edo, Mista Johnson Kokumo, wanda ya tabbatar da faruwar lamarin ya ce Miracle ta sayi wata wayar hannu ne da kudin da ta sayar da jaririyar tata, al’amarin da ya bayyana da babban laifi. Miracle ta ce wata mai suna Maman Joy wadda ta gudu ita ta matsa mata ta sayar da jaririyar domin da ba mijinta kudin ya fara kasuwanci, inda ta dora laifin yin aika-aikar kan damuwa da gazawar mijin ya kula da ita da ’ya’yanta. “Na haifi ’yata a ranar 21 ga Yuli. Kuma na sayar da ita ce saboda damuwa. Mijina yana shan wahala wajen kula da mu. kawata (Maman Joy) ta ce tunda mijina ba ya iya daukar nauyinmu idan na yi haka (na sayar da ita) sai in ba mijina kudin ya fara kasuwanci ko ya sayi babur,” inji ta. Ta ce: “Bayan mako biyu ta sake zuwa. Ban san me ya faru da ni ba. Sai na dauki jaka na sanya wasu kaya na tafi. Na sayar da ita ce ga wani gidan kula da marayu a Anacha. Gidan marayun sun sayi jaririyar ce a kan Naira dubu 200. Na sayi wayar hannu ce kawai. Ban yi niyyar saya ba, amma ita (Maman Joy) ta tilasta ni yin haka.” Mai jegon wadda ta ce ta yi nadama kan wannan danyen aiki da ta tafka daga baya ta shaida wa fastonta abin da ta yi, inda ta kara da cewa: “Na shaida wa fastona abin da na yi, kuskure ne da ba zan iya yafe wa kaina ba. Don haka ni da mijina muka je caji ofis muka yi rahoto. Na san abin da na yi ba ya da kyau. Ina fata ’yata za ta yafe min.” Kwaminshinan ’Yan sandan ya ce, za su kwato jaririyar tare da gabatar da wadanda ake zargin a gaban kotu. . Copyright @aminiya