Ni Ban damu da ficewar wasu daga APC ba – inji Shugaba Buhari

Shugaban kasa, Muhammadu Buhari ya bayyana cewa babu abin da ya dame shi da masu ficewa daga jam’iyyarsa ta APC zuwa jam’iyyar adawa ta PDP ...

Shugaban kasa, Muhammadu Buhari ya bayyana cewa babu abin da ya dame shi da masu ficewa daga jam’iyyarsa ta APC zuwa jam’iyyar adawa ta PDP da sauran jam’iyyu. Shugaba Buhari ya sanar da haka ne a ranar Lahadin da ta gabata, lokacin da yake amsa tambayoyi daga ’yan Najeriya mazauna kasar Togo, a birnin Lome. Kakakin Shugaban kasar, Garba Shehu ne ya bayyana haka a ranan Litinin, a cikin wata takarda da ya fitar a Abuja. Ya ce Shugaba Buhari ya ce bai damu ba, saboda ’yan Najeriya suna da kyakkyawan yakini a kan gwamnatinsa, kuma suna yaba muhimman ayyukan da yake yi da kokarin da yake yi. “Ina tabbatar muku cewa mafi yawan ’yan Najeriya can a gida suna yaba aikin da muke yi,” inji Shugaban kasar. Da yake nuna farin cikinsa, kan yadda dandazon ’yan Najeriya mazauna Togo suka taru daga yankunan kasar biyar domin ganawa da shi, Shugaba Buhari ya yi murna da yadda suke ba shi labarin irin gagarumin ci gaba da ya samar a Najeriya. Wannan ya nuna lallai, suna kasar Togo da zama, amma zukatansu suna Najeriya. Haka Shugaban ya shaida musu cewa da a ce gwamnatocin baya sun yi amfani da kashi 25 bisa 100 na kudaden danyen man fetur, to da Najeriya ba za ta yi kukan komai ba a halin yanzu. Ya buga misali da Dala biliyan 16 da aka salwantar wajen kokarin farfado da wutar lantarki, amma ba a samu wutar ba, sai ma karin duhu. Sannan sai ya yi musu alkawarin cewa za a sayar da dukan duk kadarorin da aka kwato daga hannun wadanda suka wawure su, sannan a sanya kudin cikin baiti- malin Najeriya. . Copyright @aminiya