Idan har Na Zama Shugaban Kasa Zan Kawo Karshen Boko Haram -Inji Atiku

Tsohon mataimakin shugaban kasa Alhaji Atiku Abubakar, ya sha alwashin kawo karshen matsalar Boko Haram muddin ‘yan Nijeriya suka zabe shi a...

Tsohon mataimakin shugaban kasa Alhaji Atiku Abubakar, ya sha alwashin kawo karshen matsalar Boko Haram muddin ‘yan Nijeriya suka zabe shi a matsayin shugaban kasa a babban zaben 2019. Atiku, wanda ke magana da magoya bayan jam’iyyar PDP a Maiduguri fadar jihar Borno, ya ce hatta matsalar fadan Fulani makiyaya da manoma, ya ki ci, ya ki, cinye wa ne sakamakon rashin ingantacciyar gwamnati a kasa. Tsohon mataimakin shugaban kasar ya kuma yi kira ga ‘yan Nijeriya da su yi dandazo su fito zabe domin tabbatar da ganin sun kau da jam’iyyar APC daga mulkin kasar. Ya ce “Nijeriya ta kawo karshen yakin basasa cikin shekara biyu da rabi kawai, duk da kurmin dajin yankin kudanci, na rasa gane me ya sa yaki da ‘yan bindigar Boko Haram ya dauke mu tsawon shekaru tara ba a magance shi ba, akwai dai abin da ba daidai ba. “idan aka zabe ni a matsayin shugaban kasar Nijeriya, ba zan kyale duk wani shugaban rundunar tsaro ya ba ni labari haka kawai ba, dole mu kawo karshen matsalar ‘yan bindigar cikin karamin lokaci, saboda matsalar ta lalata komai a Arewa maso gabas” in ji Atiku. . Copyright @ leadershipayau